નવી દિલ્હી, તા. ૯
રાજ્યસભામાં મંગળવારે અનોખો ઈતિહાસ રચાયો હતો. છેલ્લાં ૧૪ વર્ષથી અભરાઈએ ચઢાવી દીધેલા અત્યંત મહત્ત્વાકાંક્ષી મહિલા અનામત ખરડાને રાજ્યસભાએ ૧૮૬ વિરુદ્ધ ૧ મતથી પસાર કર્યો હતો. યુપીએના સાથી પક્ષો આરજેડી અને સમાજવાદી પાર્ટીના ભારે વિરોધ વચ્ચે આ બંને પક્ષોએ યુપીએ સરકારને બહારથી આપેલો ટેકો પાછો ખેંચી લીધા પછી સરકારના અસ્તિત્વ સામે ખતરો સર્જાયો હોવા છતાં યુપીએ સરકારે બહુમતીથી ખરડો પસાર કરતાં હવે લોકસભા અને રાજ્ય વિધાનસભામાં મહિલાઓ માટે ૩૩ ટકા બેઠકો અનામત રાખવાનો માર્ગ ખુલ્લો થયો છે.